Comunita' di Israele - Associazione ONLUS

LETTERA FRATERNA n. 85 - Aprile 2016

Lu scrusciu di 'na vasata




  

Lu sapìti chi scrusciu fa 'na vasata?

Fa lu scrusciu di milli ciancianeddi,
di milli coccia d'acqua caduti di 'ncelu,
di centu cannati chini di diamanti,
di centu viulina e di milli cantanti.

'Sti vasati fannu 'stu scrusciu
quannu si dùnanu cu disideriu,
cu passioni, cu amuri, cu affettu,
tràsinu 'nta lu cori, 'nta lu pettu.

Cchiù forti è lu scrusciu
cchiù duci è la vasata
e lu sapuri resta
pi tutta la jurnata.

Cc'è la vasatedda,
la vasata e la vasatuna,
la megliu è chidda
quannu cu amuri si duna.

'Na vasata data di matina
fa tantu scrusciu
ca s'addiviglia
puru la vicina.

Cu 'na vasata data sutta li cuperti
senti la musica di milli cuncerti.
Cu 'na vasata data cu tutti li sintimenti
senti tutti li campani di lu cuntinenti.

Si nun ci criditi
facìti la prova,
'na vasata cu lu scrusciu
la vita vi rinnova.

  

Scarica questo articolo come pdf

Condividi questo articolo su Facebook! Condividi

Segnala questo articolo ad un amico:



Stampa questo articolo